Özünə xəsarət yetirən insanların diaqnozu - PATOMİMİYA
5 Sentyabr 2019 17:01 | 582
Hər bir insan həyatında bir dəfə də olsun elə bir vəziyyətə düşür ki, çarəsizlikdən intihara cəhd edə bilməsə də, özünə xəsarət yetirir. Bu, xüsusilə ağır psixi durumlarda, depressiyalarda biruzə verir.
Ruhi əziyyətini azaltmaq üçün, özünü cəzalandırmaq və daxilindəki acını zahiri ağrı ilə soyutmaq üçün bu insanlar bədənlərinə zərbə vurur: kəsir, cızır, döyür, göyərdir, dərini qopardır və s.
Patomimiya adlanan bu hal bir növ insanın özünü azad hiss etməsi, yığılmış gərginliyi çıxarmaq istəyinin təzahürüdür. Amma bu əslində heç də yüngülləşdirici təsir göstərmir, şəxsiyyətin parçalanması və dağılmasını sürətləndirir, insanı daha aciz duruma salır və getdikcə təşviş, qorxu, gərginlik artır.
Sanki narkotik kimi, özünə xətər yetirmə hissi hər dəfə daha güclü zərbə tələb edir. Ən sonunda isə intihara əl ata bilir.
Patomimiya- tibdə psixogen dermatozdur. Xəstə saçına, dərisinə, dırnaqlarına, bədən səthinə stresin təsirindən zərər yetirir.
Yer üzündə 10 % insan hirsini, nifrətini, çıxılmaz durumunu bu yolla çıxarır. Daha çox aşağı sinif şagirdləri, yeniyetmələr, gənc qızlar, hamilə qadınlar arasında rast gəlinir. Kişilər 30 yaşdan sonra nadir halda belə hərəkət edir. Pasiyent autoaqressiyadan istifadə edərək özünü düşmənlərindən, ona acı yaşadan insan və cəmiyyətdən təcrid edir.
Əlamətləri:
-İnsan üzünü, qollarını, ayaqlarını, qarının dırnaqları ilə cızır, iti əşya ucu ilə cızıqlar atır, saçlarını qoparır, yeyir, dırnaqlarını dibinə kimi gəmirir, dodağını qanayana kimi dişləyir, dərisini sıyırır, qanadır, deşir və s.
-Digər əlamət, xəstə elə hesab edir ki, onda sağalmaz dəri xəstəliyi var və tez-tez onu yuyur, spirtləyir, sürtür, baxır.
-Bu pasiyentlər uzun qol geyim geyinir, izləri qolbaq və digər vasitələrlə gizlətməyə çalışır
Yaranma səbəbləri:
- İnsan psixikasının qəribəliyi və müxtəlifliyidir. Psixoloji travma, uğursuzluq, çıxılmazlıq, depressiya, nevroz və s. İnsanın ruhunu fiziki tarazlığından ayıran istənilən səbəblər. Hiperhəssaslıq, infantillik, emosional gərginlik və zəiflik.
- Problem narkotika və içkidən istifadə edən gənclərdə də çox olur.
- Diqqətdən kənar qalmış, fikrini istəyini çatdıra bilməyən uşaqlar da valideynlərin diqqətini çəkmək, qayğı görmək və ya özünə sərfəli bir şeyi əldə etmək üçün ixtiyari və ya qeyri-ixtiyari bu yola əl ata bilir.
Ağır xəstəliklər:
-Şizofreniya, hallüsinasiya görmək, sinir sisteminin neyroinfeksiyası, beyində şişlər, insult, beyin kəllə travmasından sonra da bu hal yaşana bilir.
Müalicə:
Yalnız psixoteravtin təyin etdiyi dərman müalicəsi ilə. Əgər vaxtında müalicə olunmasa bura ikincili infeksiya da qoşula bilər, irinli ocaqlar yaranır, toxumalarda çapıqlar, dırnaqların deformasiyası, başda keçəllik, alopesiya və s.
Psixoterapevt seanslarla xəstəyə özününəzarəti və vaxtında dayanmağı öyrədir. Xəstə gündəlik yazır, rəsm çəkir, eləcə də düymə və ya təsbeh və təsbehə bənzər vasitələrlə diqqəti cəmləməyi öyrənir.